Vasugi Lakshmanan · DMK ITWing இடம் பகிரங்க மன்னிப்பைக் கோருகிறேன்!
சில வாரங்களுக்கு முன்பு திமுக ஐடி விங் முகநூலில் அபத்தமான பிழைகளோடு அடுத்தடுத்து இரண்டு பதிவுகள் வந்ததைக் கண்டு பொறுக்க முடியாமல் ஸ்க்ரீன் ஷாட் எடுத்து பதிவிட்டிருந்தேன்!
செய்திக்குப் பொருத்தமான ஹேஷ்டேக்ஸ் கூட போடவில்லை என்பதையும் சுட்டிக்காட்டி அதன் தலைமைப் பொறுப்பில் உள்ள (நியூஸ் 18இல் என்னுடன் பணியாற்றிய) ஒருவருக்கு டிஜிட்டல் மீடியா பற்றி தெரியாததால்தான் அப்படியெல்லாம் நேர்வதாகக் கருதி அந்தக் குழுவுக்கு நான் வேண்டுமானால் பயிற்சியளிக்கத் தயாராக இருக்கிறேன் என்றும் தெரிவித்திருந்தேன்.
அனைத்துக் கட்சி சமூக ஊடகங்களையும் பின் தொடரும் நான், //என்னவோ மணிப்பூரில் வாழ்வது போன்ற மாயத் தோற்றத்தை ஏற்படுத்தும் அளவுக்கு தவெக நாளொன்றுக்கு நான்கு செய்திக் கதைகளை திரித்து உருவாக்கிப் பகிரும் நிலையில், திமுகவின் whatsapp சேனலில் சில நாட்கள் வெறும் திருக்குறள் பதிவதோடு நின்று விடுகிறார்கள் என்றும் குறை கூறியிருந்தேன்!
ஆனால் ஒய்எம்சிஏ மைதானத்தில் இன்று நடைபெற்ற ஐடி விங் நிர்வாகிகள் மற்றும் சமூக வலைதளத்தில் திராவிடக் கொள்கை சார்ந்து எழுதுபவர்களுடனான துணை முதலமைச்சர் & முதலமைச்சர் ஆகியோரின் சந்திப்புக் கூட்டத்துக்கு (என்னதான் செய்கிறார்கள் என்று அறிந்து கொள்ளும் ஆவலில்) மிகுந்த தயக்கத்தோடு சென்றிருந்த எனக்கு மண்டையில் குட்டி ஒரு விஷயத்தை உணர்த்தினார்கள்!
சுமார் 500 பேர் வருவார்கள் என்று கணித்திருந்த எனக்கு பெரு வியப்பு காத்திருந்தது! காரணம் அங்கே சுமார் 5,000 பேர் (இன்னும் அதிகமாகவும் இருக்கலாம்) வந்திருந்தார்கள்!
நிகழ்ச்சி அவ்வளவு சிறப்பாக திட்டமிடப்பட்டிருந்தது. அப்படி ஒரு கட்டுக்கோப்பு! குடிநீர், A2B-யில் இருந்து ரிப்பன் பக்கோடா & Dry fruits and Nuts ஆல் செய்யப்பட்ட கேக், பழச்சாறு டின்கள், ஒரு பெரிய காட்டன் பையில் காலண்டர் உள்ளிட்ட வேறு என்னென்னவோ பொருட்கள் என பலதும் கொடுத்தார்கள்! (பழச்சாறு & பையெல்லாம் நான் வாங்கவில்லை)
இரண்டாவதாக பேசிய பள்ளிக்கல்வித்துறை அமைச்சர் Anbil Mahesh Poyyamozhi அவர்கள், மிகச் சிறப்பான உரையை ஆற்றினார்.
அதன்பின் திமுக ஐடி விங் செயல்பாடு பற்றிய ஒரு ஏவி-யை ஒளிபரப்பினார்கள்! அதைப் பார்த்ததும் அசந்து போய்விட்டேன்!
அதில் அவர்கள் சொல்லியிருந்த விஷயங்கள் அனைத்தும் //எனது முந்தைய பதிவுக்கான பதிலாகவே இருந்தது// போலத் தோன்றியது!
அடுத்து பேசிய துணை முதலமைச்சர் Udhayanidhi Stalin அவ்வளவு முதிர்ந்த ஒரு உரையை ஆற்றினார்! சொல்லப்போனால் கலைஞரின் உரையைப் போலவே சுவாரசியமாகவும் அது இருந்தது! அமைச்சர் TRB Rajaa அவர்கள் தலைமையிலான தகவல் தொழில்நுட்ப அணி தமிழ்நாடு முழுவதும் எவ்வளவு சிறப்பாக செயல்பட்டு வருகிறது என்பதை எடுத்துரைத்தார்.
"தமிழ்நாட்டு அரசியலில் ஒரு புதிய வைரஸ் உருவாகி இருக்கிறது -
எந்த வைரஸையும் உள்ளே வரவிடாமல் தடுக்கும் ஃபயர்வாலாக நீங்கள் இருக்க வேண்டும்!
Misinformation Disinformation என்று இரண்டு வகை தகவல்கள் பரப்பப்படும். முதலாவது தவறான தகவலை உண்மை என்று நம்பி பரப்புவது, இரண்டாவது மத தீவிரவாதிகள் செய்வதைப்போல - தப்பான தகவல் என்பதைத் தெரிந்தே உள்நோக்கத்தோடு பரப்புவது! அந்த இரண்டையும் சரியான தகவல்களைத் தந்து நீங்கள்தான் முறியடிக்க வேண்டும். அன்றாட செய்திகளில் அப்டேட் ஆக இருக்க வேண்டும். தினமும் செய்தித்தாளைப் படியுங்கள்" என்றெல்லாம் அறிவுறுத்தினார்!
அரங்கினுள் நுழைந்தது முதலே கட்சிக் கூட்டத்துக்கு வந்த ஒரு நெருடல் இருந்துகொண்டே இருந்ததாலும், நான் நினைத்தது போல தகவல் தொழில்நுட்பத்தில் திமுக - ஒன்றும் தெரியாமல் இல்லை .
மற்றவர்களைப் போல பொய்ச் செய்திகளைப் பரப்பாமல், மற்றவர் பரப்பும் பொய் செய்திகளுக்கு ஃபேக்ட் செக்கிங் மூலமாக உண்மையை விளக்குவது,
ஆட்சியின் செயல்பாடுகள் சாதனைகள் ஆகியவற்றை எடுத்துரைப்பது என்பன உள்ளிட்ட வகைகளில் மிகச் சரியான வழியில் பயணிப்பதை அறிந்து கொண்டதாலும், உடன் வந்திருந்த குடும்ப நண்பரும் புறப்பட்டதாலும் -
முதலமைச்சர் உள்ளிட்ட மற்ற பலரின் உரைகளைக் கேட்க முடியாமல் கிளம்பிவிட்டேன்!
திமுக ஐடி விங் whatsapp Channelஇல் தான் பெரிய அளவில் செய்திகள் பகிரப்படுவதில்லையே தவிர,
மற்ற (வகைகளில்) சமூக ஊடகங்களில் (நிர்வாக வகையில் ஒவ்வொரு அணிக்கும் கிராம அளவில் கூட நிர்வாகிகளைக் கொண்டு வலிமையோடு இருப்பதைப் போலவே) வேறு எந்தக் கட்சியை விடவும் தகவல் தொழில்நுட்பத் துறையிலும் திமுக வளமான & வலிமையான அடித்தளத்தோடு வெகு சிறப்பாகவே செயல்பட்டு வருகிறது என்பதை அறிந்து கொண்டேன்!
முந்தைய எனது தவறான புரிதலுக்காகவும் பதிவுக்காகவும் பகிரங்க மன்னிப்பைக் கோருகிறேன்!
"டெக்னாலஜி எங்கயோ போய்கிட்டு இருக்கு, உங்களோட டெக்னிக்கையாவது மாத்துங்க" என்று அண்மையில் திமுகவுக்கு அறிவுரை கூறிய நடிகர் TVK Vijay -க்கு ஒரேயொரு விஷயத்தைச் சொல்ல வேண்டும்.
நேற்று பெய்த மழையில் இன்று பூத்த காளானான நீங்கள்,
விசிலடிச்சான் குஞ்சுகள் கூட்டத்தைக் கண்ட மமதையில் - (கடைக்கோடி பாமர தொண்டர்களிடம் கூட உணர்வுபூர்வமான பற்றுதலையும் அரசியல் தெளிவையும் கொண்டு) எழுபது ஆண்டுகளாக வேரூன்றி விழுதுகள் பரப்பி நிற்கும் மிகப்பெரிய ஆல மரத்துக்கு - பாடம் எடுப்பது அறிவீனம்!
ஆன்லைன் வாரியர்ஸ் என்று ஏத்திவிட்டு விசிலடிச்சான் குஞ்சுகளை வைத்து நீங்கள் எவ்வளவுதான் பொய்த் தகவல்களைப் பரப்பினாலும் வாய்ப்பில்லை ராஜா!
முக்கியமான குறிப்பு: நான் இதுவரை எந்தக் கட்சிக் கூட்டத்திலும் கலந்து கொண்டதில்லை!
கட்சியில் உறுப்பினர் அல்லாதோரும் பங்கேற்கலாம் என்றதால் முதன்முறையாக இந்தக் கூட்டத்திற்குச் சென்றேன்!
கூட்டத்துக்கான அடையாள அட்டை தாங்கிய Tag-ஐ நான் மட்டும்(தான்) அணிந்து கொள்ளவில்லை!
ஆனால் துறை அமைச்சர் முதல், துணை முதலமைச்சர் வரை அனைவரும் அதை கழுத்தில் அணிந்துகொண்டு பேசியது(ம்) அக்கட்சியின் ஒழுங்குப்பாட்டை உணரச் செய்தது!
அகர முதல என்று ஒளிபரப்பப்பட்ட ஒரு பாடல் தொண்டர்களை அவ்வளவு உணர்வுபூர்வமாக எழுச்சி பெற வைத்தது!
கருத்துகள் இல்லை:
கருத்துரையிடுக