காங்கிரஸ் மீண்டும் திமுகவின் முதுகில் குத்தி விட்டது? ஏமாற்றி விட்டார் ராகுல்?

 tamil.oneindia.com  - Shyamsundar :  மம்தா, கெஜ்ரிவாலை எதிர்த்து.. ராகுலுக்காக நின்ற ஸ்டாலின்.. பதிலுக்கு சீண்டி பார்க்கும் காங்கிரஸ்!
சென்னை: கடந்த பத்து ஆண்டுகளுக்கும் மேலாக, திமுக தலைவர் மு.க.ஸ்டாலின் மற்றும் காங்கிரஸ் தலைவர் ராகுல் காந்தி இடையேயான அரசியல் நட்பு, மதச்சார்பற்ற முற்போக்குக் கூட்டணியின் அஸ்திவாரமாக இருந்து வருகிறது. 2019 மற்றும் 2024 ஆகிய இரு மக்களவைத் தேர்தல்களிலும், அகில இந்திய அளவில் ராகுல் காந்தியைப் பிரதமர் வேட்பாளராக முன்மொழிந்த முதல் தலைவர் மு.க.ஸ்டாலின் தான்.
மம்தா பானர்ஜி, அரவிந்த் கெஜ்ரிவால் போன்ற மற்ற கூட்டணிக் கட்சித் தலைவர்கள் ராகுல் காந்தியின் தலைமையை ஏற்கத் தயங்கியபோதும், "ராகுல் தான் என் சகோதரர்" என்று கூறி ஸ்டாலின் உறுதியாக நின்றார். ஆனால், 2026 தமிழ்நாடு சட்டமன்றத் தேர்தல் நெருங்கும் வேளையில், இந்த "சகோதர பாசம்" கடும் சோதனையைச் சந்தித்து வருகிறது.

கடந்த காலங்களில் ராகுல் காந்திக்காக அகில இந்திய அளவில் வக்காலத்து வாங்கிய ஸ்டாலினுக்கு, தற்போது காங்கிரஸ் தரப்பில் இருந்து உரிய ஆதரவு கிடைக்கவில்லை என்ற ஆதங்கம் அரசியல் வட்டாரத்தில் எழுந்துள்ளது. குறிப்பாக, தமிழக காங்கிரஸ் தலைவர்கள் திமுகவை மிகக் கடுமையாகத் தாக்கிப் பேசி வரும் சூழலில், ராகுல் காந்தி அவர்களைக் கட்டுப்படுத்தாமல் மௌனம் காப்பது திமுகவினரிடையே அதிருப்தியை ஏற்படுத்தியுள்ளது.
திமுகவைச் சீண்டும் காங்கிரஸ் தலைவர்கள்: சில உதாரணங்கள்

சமீபகாலமாக மாணிக்கம் தாகூர் மற்றும் பிரவீன் சக்ரவர்த்தி போன்ற காங்கிரஸ் முக்கியத் தலைவர்களின் கருத்துக்கள் கூட்டணியில் பெரும் புயலைக் கிளப்பியுள்ளன:

மாணிக்கம் தாகூர்: காங்கிரஸ் கட்சி இனி "12-வது ஆட்டக்காரராக" (12th Man) இருக்க முடியாது என்றும், தமிழகத்தில் ஆட்சி அதிகாரம் (Power Sharing) வேண்டும் என்றும் பகிரங்கமாகக் கோரிக்கை விடுத்துள்ளார். மேலும், திமுக செய்த தவறுகளுக்காக காங்கிரஸ் பழியைச் சுமக்க முடியாது என்றும் அவர் சாடியுள்ளார்.

Recommended For You
தனக்கு தானே குழியை தோண்டும் காங்கிரஸ்? தலையிட்ட டெல்லி தலைமை.. பறந்த முக்கிய உத்தரவு!

பிரவீன் சக்ரவர்த்தி: தமிழகத்தின் கடன் சுமை உத்தரப் பிரதேசத்தை விட மோசமாக இருப்பதாகக் கூறி திமுகவின் பொருளாதார மேலாண்மையை விமர்சித்தார். அதுமட்டுமின்றி, திமுக எம்.எல்.ஏக்கள் காங்கிரஸ் வாக்குகளால்தான் வெற்றி பெறுகிறார்கள் என்று கூறி திமுகவின் தனித்தன்மையை உரசிப் பார்த்தார்.
பதிலடி தராத ராகுல்; தவிக்கும் ஸ்டாலின்

தமிழகத்தில் இவ்வளவு கசப்பான சம்பவங்கள் நடந்தாலும், ராகுல் காந்தி ஒருமுறை கூட ஸ்டாலினுக்கு ஆதரவாகவோ அல்லது தன் கட்சி நிர்வாகிகளைக் கண்டித்தோ பேசவில்லை. மாறாக, ராகுல் காந்தியே சமீபத்தில் கனிமொழியுடன் நடத்திய பேச்சுவார்த்தையில் தமிழக அமைச்சரவையில் காங்கிரஸ் அமைச்சர்களுக்கு இடமளிக்க வேண்டும் (Power Sharing) என்று கோரிக்கை விடுத்ததாகத் தகவல்கள் வெளியாகியுள்ளன.

தேசிய அரசியல் பயணத்தில் ராகுல் காந்திக்கு துணையாக நின்ற ஸ்டாலினுக்கு, தற்போது ராகுல் அதே அளவு விசுவாசத்தைக் காட்டவில்லை என்றே தெரிகிறது. நடிகர் விஜய்யின் தமிழக வெற்றிக் கழகம் (TVK) காங்கிரஸுக்குத் தூது விடுவதும், அதற்கு ராகுல் தரப்பு மௌனம் காப்பதும் திமுகவை மேலும் யோசிக்க வைத்துள்ளது. மம்தா, கெஜ்ரிவாலை எதிர்த்து.. ராகுலுக்காக நின்ற ஸ்டாலினுக்கு இப்போது ஏமாற்றமே மிஞ்சி உள்ளது.