மின்னம்பலம் - christopher : விழுப்புரம் மாவட்டத்துக்கு 11 புதிய அறிவிப்புகளை முதல்வர் மு.க.ஸ்டாலின் இன்று (ஜனவரி 28) வெளியிட்டார்.
இரண்டு நாள் பயணமாக விழுப்புரம் வந்துள்ள முதல்வர் மு.க.ஸ்டாலின் இன்று காலை வழுதரெட்டி கிராமத்தில், முன்னாள் திமுக அமைச்சர் ஏ.கோவிந்தசாமி நினைவரங்கம் மற்றும் 21 சமூகநீதிப் போராளிகளுக்கு ரூ. 5.70 கோடி செலவில் அமைக்கப்பட்டுள்ள மணிமண்டபத்தை திறந்து வைத்து மரியாதை செலுத்தினார்.
தொடர்ந்து நடைபெற்ற அரசு நலத்திட்ட உதவிகள் வழங்கும் விழாவில் ஸ்டாலின் கலந்துகொண்டார்.
அப்போது அம்மாவட்டத்தில் ரூ.424.98 கோடி செலவில் 231 முடிவுற்ற பணிகளை திறந்து வைத்து, ரூ.133.30 கோடி மதிப்பீட்டில் 116 புதிய திட்டப் பணிகளுக்கு அடிக்கல் நாட்டினார்.
அப்போது விழுப்புரம் 11 புதிய அறிவிப்புகளை அவர் வெளியிட்டு பேசியதாவது, “விழுப்புரம் மாவட்டத்தை முன்னேற்ற நாம் ஏராளமான பணிகளை செய்திருக்கிறோம். நேற்றிரவு மாவட்ட ஆட்சியர் உள்ளிட்ட மாவட்ட உயர் அதிகாரிகளோடு நடத்திய ஆய்வுக் கூட்டத்தில், நடைபெற்றுக் கொண்டிருக்கக்கூடிய பணிகள், நடைபெறக்கூடிய பணிகள், இன்னும் நிறைவேற்றப்படக்கூடிய பணிகள் குறித்து ஆய்வு செய்தோம். அப்போது இந்த மாவட்டத்திற்கான தேவைகளையும் நான் கேட்டுக் தெரிந்து கொண்டேன்.
அதையொட்டி இந்த மாவட்டத்திற்கான 11 புதிய அறிவிப்புகளை நான் இங்கே வெளியிட விரும்புகிறேன்.
🔻முதல் அறிவிப்பு – சாத்தனூர் அணையின் உபரி நீரை நந்தன் கால்வாயில் இணைப்பதற்கான ஊட்டு கால்வாய் அமைக்கவேண்டும் என்று செஞ்சி, விக்கிரவாண்டி, விழுப்புரம், வாலூர், பென்னாத்தூர் மற்றும் திருவண்ணாமலை பகுதி உழவர் பெருமக்கள் பல ஆண்டு காலமாக கோரிக்கை வைத்துக்கொண்டு இருக்கிறார்கள். இந்த நீண்ட கால கோரிக்கையை நிறைவேற்றும் வகையில், 304 கோடி ரூபாய் செலவில் நந்தன் கால்வாய் திட்டம் செயல்படுத்தப்படும்.
🔻இரண்டாவது அறிவிப்பு – விழுப்புரம் வட்டத்தில், கடந்த ஆட்சிக்காலத்தில் கட்டப்பட்டு, வெள்ளத்தால் சேதம் அடைந்த, தளவானூர் அணைக்கட்டு 84 கோடி ரூபாய் செலவில் புனரமைக்கப்படும்.
🔻மூன்றாவது அறிவிப்பு – கண்டமங்கலம் ஊராட்சி ஒன்றியத்தில், சங்கராபரணி ஆற்றின் குறுக்கே, வழுதாவூர் அருகில் 30 கோடி ரூபாய் மதிப்பீட்டில் தடுப்பணை அமைக்கப்படும்.
நான்காவது அறிவிப்பு – காணை மற்றும் கோலியனூர் ஒன்றியங்களில் இருக்கும் 29 கிராம மக்கள் பயன்பெறும் வகையில் 35 கோடி ரூபாய் செலவில் புதிய கூட்டுக் குடிநீர் திட்டம் செயல்படுத்தப்படும்.
🔻ஐந்தாவது அறிவிப்பு – விக்கிரவாண்டி பேரூராட்சியில் இருக்கும் கக்கன் நகரில், ஒரு கோடியே 50 இலட்சம் ரூபாய் செலவில், பல்நோக்கு சமுதாயக் கூடம் அமைக்கப்படும்.
🔻ஆறாவது அறிவிப்பு – செஞ்சி மற்றும் மரக்காணத்தில் தலா 5 கோடி அரசு தொழிற்பயிற்சி நிலையங்கள் ரூபாய் மதிப்பீட்டில், புதிய தொடங்கப்படும்.
🔻ஏழாவது அறிவிப்பு – திருவாமாத்தூர் அபிராமேஸ்வரர் கோயில் இடத்தில், இந்து சமய அறநிலையத் துறையின் சார்பில், நான்கு கோடி ரூபாய் மதிப்பீட்டில், திருமண மண்டபம், சமையற்கூடம் மற்றும் உணவருந்தும் இடம் ஆகியவை அமைக்கப்படும்.
🔻எட்டாவது அறிவிப்பு விழுப்புரம் நகராட்சி எல்லைக்குட்பட்ட சாலாமேடு பகுதி மக்களின் நீண்ட நாள் கோரிக்கையை நிறைவேற்றும் வகையில், 5 கோடி ரூபாய் செலவில், திருப்பாச்சனூர் ஆற்றுப்படுகையிலிருந்து குடிநீர் வழங்கப்படும்.
🔻ஒன்பதாவது அறிவிப்பு – விழுப்புரம் நகராட்சியின் பழம்பெரும் அலுவலக கட்டடம் 2 கோடி ரூபாய் செலவில் பொதுமக்களுக்கு பயன்படும் வகையில், டவுன் ஹால்-ஆக மாற்றப்படும்.
🔻பத்தாவது அறிவிப்பு – தென்னமாதேவி, அயனம்பாளையம் கிராமங்களில், பம்பை ஆற்றின் வடகரையில், சங்ககால தொல்பொருட்கள் கண்டுபிடிக்கப்பட்டிருக்கிறது. இந்தப் பகுதிகளில் தொடர்ந்து அகழ்வாராய்ச்சி பணிகள் மேற்கொள்ளப்படும்.
🔻பதினோறாவது அறிவிப்பு – வீடூர் அணையிலிருந்து மயிலம், பாதிரப்புலியூர் வழியாகச் செல்லும் 15 கிலோ மீட்டர் சாலை 8 கோடியே 50 இலட்சம் ரூபாய் மதிப்பீட்டில் மேம்படுத்தப்படும்” என மொத்தம் 11 அறிவிப்புகளை ஸ்டாலின் வெளியிட்டுள்ளார்.
கருத்துகள் இல்லை:
கருத்துரையிடுக