பாமக பாஜகவுடன் கூட்டணி!: ராமதாஸ் சம்மதம்? - இபிஎஸ் மூலம் நடந்த மாற்றம்!

 tamil.samayam.com -மரிய தங்கராஜ்   தமிழ்நாட்டில் சட்டமன்றத் தேர்தல் என்றாலும், நாடாளுமன்றத் தேர்தல் என்றாலும் பாமக எந்த அணியில் இடம்பெறப் போகிறது என்பது முக்கிய விவாதமாக மாறும்.
 சமீபத்தில் நடைபெற்ற நாடாளுமன்றத் தேர்தலில் அதிமுக தலைமையிலான கூட்டணிக்கு பாமக செல்லுமா அல்லது பாஜகவின் தேசிய ஜனநாயக கூட்டணிக்கு செல்லுமா என்று தொடர்ந்து பேசுபொருளாக இருந்தது.

பாமகவில் அன்புமணி ராமதாஸ் பாஜக பக்கம் செல்வோம் என்று கூறிவந்ததாகவும், ராமதாஸ் அதிமுக பக்கம் செல்லலாம் என்று கூறியதாகவும் அப்போதே பேச்சுக்கள் எழுந்தன. இந்த இழுபறி நடைபெற்று வந்த நிலையில் அண்ணாமலை தைலாபுரம் தோட்டத்துக்கு நேரடியாக சென்று பேசி பாமகவை பாஜக கூட்டணிக்கு அழைத்து வந்தார்.
அதிமுக - பாஜக கூட்டணி உருவாகிவிட்டதா? எடப்பாடி பழனிசாமி சொன்ன நச் பதில்!
இந்த கூட்டணி குறிப்பிடத்தக்க வாக்குகள் பெற்றாலும் பாஜகவின் வாக்குகள் பாமகவுக்கோ, பாமகவின் வாக்குகள் பாஜகவுக்கோ செல்லவில்லை என்று தேர்தல் வியூக வகுப்பாளர்கள் கருத்து தெரிவிக்கின்றனர். அதாவது பாமக வடக்கு மண்டலங்களில் வலுவாக உள்ளது. இந்த இடங்களில் பாஜக வலுவாக இல்லை. பாஜக வலுவாக இருக்கும் கன்னியாகுமரி போன்ற இடங்களில் பாமக வலுவாக இல்லை.

ஒருவரது வாக்குகள் இன்னொருவருக்கு ஷிஃப்ட் ஆனால் தான் கூட்டணி வைத்ததன் மூலம் பிரயோஜனம் ஏற்படும். ஆனால் பாமக - அதிமுக இடையே வாக்குகள் ஷிஃப்ட் ஆகும். உதாரணத்திற்கு எடப்பாடி பழனிசாமியின் சொந்த தொகுதியான எடப்பாடியில் பாமகவுக்கும் ஆதரவு வாக்கு வங்கி உள்ளது. அங்கு அதிமுக களமிறங்கினால் பாமகவின் வாக்குகள் அந்த கட்சிக்கு செல்லும். அதேபோல் பாமக போட்டியிடும் வட மாவட்டங்களில் அதிமுக வாக்குகள் அக்கட்சிக்கு எளிதாக மாறி வரும். கூட்டணி மூலம் இரு தரப்புக்கும் பயன் ஏற்படும்.

ஸ்டாலின் பச்சையா பொய் சொல்றார் - எடப்பாடி பழனிசாமி

இந்நிலையில் சட்டமன்றத் தேர்தலிலும் பாமக - பாஜக கூட்டணி தொடருமா இதற்கு ராமதாஸ் ரியாக்‌ஷன் என்னவாக இருக்கும் என்ற எதிர்பார்ப்பு நிலவி வந்தது.

இந்த சூழலில் பாஜக சார்பில் நேற்று சென்னை எழும்பூரில் இப்தார் நோன்பு திறப்பு நிகழ்வு நடைபெற்றது. இதில் கலந்து கொள்ள பாமகவுக்கு அழைப்பு விடுக்கப்பட்டது. பாமக சார்பில் யார் கலந்து கொள்வார்கள் என்ற எதிர்பார்ப்பி நிலவியது. இந்த சூழலில் எடப்பாடி பழனிசாமி டெல்லி சென்று அமித் ஷாவை சந்திக்க உள்ளதாக தகவல் வெளியானது. உடனே ஜிகே மணியை கலந்து கொள்ளுமாறு ராமதாஸ் கூறியதாக சொல்கிறார்கள்.

அதிமுகவானது பாஜக கூட்டணிக்கு வந்துவிட்டால் தேசிய ஜனநாயக கூட்டணியில் இணைந்து செயல்படுவதில் தயக்கம் வேண்டாம் என்ற முடிவுக்கு ராமதாஸ் வந்துவிட்டார். அதன் வெளிப்பாடாகவே ஜிகே மணியை பாஜக நிகழ்வுக்கு அனுப்பியுள்ளார் என்கிறார்கள்.