மாணவி அனிதாவின் குடும்பத்துக்கு முதல்வர் எடப்பாடி பழனிசாமி அறிவித்த 7 லட்சம் ரூபாயை அனிதாவின் உறவினர்கள் வாங்க மறுத்துவிட்டனர்.
அரியலூர் குழுமூர் கிராமத்தைச் சேர்ந்த மாணவி அனிதா நீட் தேர்வால் மருத்துவ கனவு தகர்க்கப்பட்டதை தாங்கி கொள்ள முடியாமல் தற்கொலை செய்து கொண்டார். அனிதாவின் மரணம் தமிழக முழுவதும் கொந்தளிப்பை ஏற்படுத்தியது.அனிதாவின் மரணத்தை தொடர்ந்து முதல்வர் எடப்பாடி பழனிசாமி 'அரியலூர் மாணவி அனிதாவின் தற்கொலை செய்தி கேட்டு மிகவும் துயரம் அடைந்தேன். தற்கொலை செய்துகொண்ட மாணவி அனிதாவின் குடும்பத்துக்கு 7 லட்ச ரூபாய் நிதியுதவி வழங்கப்படும். அனிதாவின் குடும்பத்தைச் சேர்ந்த ஒருவருக்கு கல்வித் தகுதி அடிப்படையில் அரசுப்பணி வழங்கப்படும். மாணவ, மாணவிகள் இதுபோன்ற விபரீத முடிவை எடுக்க வேண்டாம். மாணவர்களின் நலனில் எப்போதும் அக்கறையோடும் உறுதுணையாகவும் அரசு செயல்படும்' என்று தெரிவித்திருந்தார்.
