minnambalam.com - Mathi : அமெரிக்காவில் விமானப் போக்குவரத்துக் கட்டுப்பாட்டு மையங்களின் தகவல் தொடர்பு அமைப்பில் ஏற்பட்ட தொழில்நுட்பக் கோளாறு காரணமாக, நாடு முழுவதும் விமான சேவைகள் கடுமையாகப் பாதிக்கப்பட்டுள்ளன. 10,500 விமானங்கள் தாமதமாகியுள்ளன; 2,700 விமான சேவைகள் ரத்து செய்யப்பட்டுள்ளன. இதனால் சுமார் 15 லட்சம் பயணிகள் தத்தளித்து வருகின்றனர்.
அமெரிக்காவின் விமானப் போக்குவரத்தை ஒழுங்குபடுத்தும் பெடரல் ஏவியேஷன் அட்மினிஸ்ட்ரேஷன் (Federal Aviation Administration – FAA) அமைப்பின் தகவல் தொடர்புக் கட்டமைப்பில் நேற்று நவம்பர் 13-ந் தேதி திடீரெனத் தொழில்நுட்பக் கோளாறு ஏற்பட்டது. இதையடுத்து அமெரிக்கா முழுவதும் விமானங்கள் புறப்படுவதற்குத் தற்காலிகத் தடை விதிக்கப்பட்டது. இதனால் பல்வேறு விமான நிலையங்களில் பயணிகள் நீண்ட நேரம் காத்திருக்க வேண்டிய நிலை ஏற்பட்டது.
22 விமானக் கட்டுப்பாட்டு மையங்களில் கோளாறு
அமெரிக்காவில் விமானப் போக்குவரத்தை ஒருங்கிணைக்கும் 22 பிராந்திய விமானப் போக்குவரத்துக் கட்டுப்பாட்டு மையங்களின் தகவல் தொடர்பு அமைப்பில் இந்தத் தொழில்நுட்பக் கோளாறு ஏற்பட்டது. விமானிகள் மற்றும் விமானப் போக்குவரத்துக் கட்டுப்பாட்டு அதிகாரிகளுக்கு இடையே தகவல்களைப் பரிமாறிக்கொள்ளும் கட்டமைப்பில் ஏற்பட்ட இந்தப் பிரச்சினையால், விமானங்கள் பாதுகாப்பாகப் புறப்படுவதை உறுதிப்படுத்துவதில் சிக்கல் ஏற்பட்டது. இதையடுத்து நாடு முழுவதும் விமானங்கள் புறப்படுவதை நிறுத்த FAA உத்தரவிட்டது. ஏற்கெனவே வானில் பறந்துகொண்டிருந்த விமானங்கள் பாதுகாப்பாகத் தரையிறங்க அனுமதிக்கப்பட்டன. ஆனால் புதிய விமானங்கள் புறப்படுவதற்குக் கட்டுப்பாடுகள் விதிக்கப்பட்டன. சில சர்வதேச விமானங்களுக்கும் அலாஸ்கா, ஹவாய் பகுதிகளுக்கான சேவைகளுக்கும் விதிவிலக்குகள் அளிக்கப்பட்டன.
10,500 விமானங்கள் தாமதம்.. 2,700 சேவைகள் ரத்து
இந்தக் கோளாறு காரணமாக 10,500 விமானங்கள் தாமதமாகின; 2,700 விமான சேவைகள் ரத்து செய்யப்பட்டன. 600-க்கும் மேற்பட்ட விமானங்கள் மாற்றுப் பாதைகளில் திருப்பிவிடப்பட்டன. அமெரிக்கா முழுவதும் விமானங்கள் புறப்படுவதற்குத் தடை விதிக்கப்பட்டதால், சுமார் 15 லட்சம் பயணிகள் பாதிக்கப்படும் நிலை ஏற்பட்டது. விமான நிலையங்களில் காத்திருந்த பயணிகள், தங்களது விமானங்கள் எப்போது புறப்படும் என்பது தெரியாமல் தத்தளித்தனர். உள்நாட்டு விமான சேவைகள் மட்டுமின்றி, அமெரிக்காவுக்குச் செல்லும் சர்வதேச விமானங்களும் பாதிக்கப்பட்டன. ஐரோப்பிய நாடுகள் மற்றும் மெக்சிகோவிலிருந்து அமெரிக்காவுக்குப் புறப்படவிருந்த சில விமானங்களின் சேவைகள் நிறுத்தப்பட்டன. கனடாவிலும் விமானப் போக்குவரத்து பாதிக்கப்பட்டது.
அமெரிக்க விமான நிறுவனங்கள் எச்சரிக்கை
அமெரிக்கன் ஏர்லைன்ஸ் (American Airlines), யுனைடெட் ஏர்லைன்ஸ் (United Airlines), ஜெட் புளூ (JetBlue), அலாஸ்கா ஏர்லைன்ஸ் (Alaska Airlines) உள்ளிட்ட முக்கிய விமான நிறுவனங்களின் சேவைகள் பாதிக்கப்பட்டுள்ளன. விமானங்கள் புறப்படும் நேரங்களில் மாற்றங்கள் ஏற்படக்கூடும் என்பதால், பயணிகள் தங்களது விமான சேவையின் தற்போதைய நிலையைச் சரிபார்த்துக்கொள்ளுமாறு நிறுவனங்கள் அறிவுறுத்தியுள்ளன.
சைபர் தாக்குதலா?
அமெரிக்கா முழுவதும் விமானப் போக்குவரத்தைப் பாதித்த இந்தத் தொழில்நுட்பக் கோளாறு, திட்டமிட்ட சைபர் தாக்குதலால் ஏற்பட்டதா என்ற கேள்வியும் எழுந்துள்ளது. ஆனால், இது சைபர் தாக்குதல் அல்லது திட்டமிட்ட நாசவேலை என்பதற்கான அறிகுறிகள் இதுவரை கண்டறியப்படவில்லை என்று அமெரிக்க உள்நாட்டுப் பாதுகாப்புத் துறை அமைச்சர் மார்க்வேய்ன் முல்லின் தெரிவித்துள்ளார்.
2023-க்குப் பிறகு மிகப்பெரிய முடக்கம்
அமெரிக்காவில் 2023-ஆம் ஆண்டு ஜனவரி மாதம் ஏற்பட்ட விமானப் போக்குவரத்துத் தொழில்நுட்பக் கோளாறுக்குப் பிறகு, நாடு முழுவதும் விமானங்கள் புறப்படுவதற்குத் தடை விதிக்கப்பட்ட மிகப்பெரிய சம்பவமாக தற்போதைய பாதிப்பு அமைந்துள்ளது.
கருத்துகள் இல்லை:
கருத்துரையிடுக