tamilmurasu.com.sg : தூத்துக்குடியில் உள்ள ஸ்டெர்லைட் ஆலையை விற்க வேதாந்தா நிறுவனம் முடிவு செய்துள்ளது. படம்: இந்திய ஊடகம்
தூத்துக்குடி: தூத்துக்குடியில் கடந்த நான்கு ஆண்டுகளாக மூடப்பட்டிருக்கும் ஸ்டெர்லைட் ஆலையை விற்க வேதாந்தா நிறுவனம் முடிவு செய்து உள்ளது.
தூத்துக்குடி ஸ்டெர்லைட் ஆலைக்கு எதிராக கடந்த 2018ஆம் ஆண்டிலிருந்து தொடர் போராட்டங்கள் நடத்தப்பட்டன. அதே ஆண்டு மே மாதம் 22ஆம் தேதி மாவட்ட ஆட்சியர் அலுவலகம் முன்பு முற்றுகை போராட்டம் அறிவிக்கப்பட்டது.
இந்தப் போராட்டத்தில் ஏராளமானோர் பங்கேற்றனர். அப்போது ஏற்பட்ட பிரச்சினை காரணமாக காவல்துறையினர் நடத்திய துப்பாக்கிச் சூட்டில் 13 பேர் உயிரிழந்தனர். இந்தச் சம்பவம் இந்தியா முழுவதும் பெரும் அதிர்வலையை ஏற்படுத்தியது. இதையடுத்து தமிழக அரசு அரசாணை பிறப்பித்த தால் 2018 மே மாதம் 28ஆம் தேதியிலிருந்து ஸ்டெர்லைட் ஆலை மூடப்பட்டது.
இதனை எதிர்த்து ஸ்டெர்லைட் நிறுவனம் சார்பில் சென்னை உயர் நீதிமன்றத்தில் மனுத் தாக்கல் செய்யப்பட்டது. அதனை விசாரித்த நீதிபதிகள், ஸ்டெர்லைட் ஆலையை மூட தமிழக அரசு விதித்த தடை தொடரும் என்று தெரிவித்தனர். ஸ்டெர்லைட் நிர்வாகம் தரப்பில் தாக்கல் செய்த மனுவை தள்ளுபடி செய்யவும் நீதிபதிகள் உத்தரவிட்டனர். சென்னை உயர் நீதிமன்றத்தின் இந்த உத்தரவை எதிர்த்து வேதாந்தா நிறுவனம் உச்ச நீதிமன்றத்தில் மேல்முறையீடு செய்தது.
இதையடுத்து கடந்த நவம்பர் மாதம், வேதாந்தா நிறுவனம் தரப்பில் தாக்கல் செய்யப்பட்ட இடைக்கால மனுவில் ஆலையில் உள்ள இயந்திர உபகரணங்கள் துருப்பிடித்து சேதமாகும் நிலையில் உள்ளதால் ஆலை பராமரிப்பு பணிகளை மேற்கொள்ள அனுமதிக்க வேண்டும் என கேட்டுக்கொள்ளப்பட்டது. இதற்கு எதிர்ப்பு தெரிவித்த தமிழக அரசு, வேதாந்தா நிறுவனத்தின் மனுவை அபராதத்துடன் தள்ளுபடி செய்ய கேட்டுக்
கொண்டது.
இதையடுத்து வேதாந்தா நிறுவனத்தின் கோரிக்கையை உச்ச நீதிமன்றம் நிராகரித்து உத்தரவிட்டது.
இந்தச் சூழ்நிலையில் ஸ்டெர்லைட் ஆலையை விற்க வேதாந்தா நிறுவனம் முடிவு செய்துள்ளது. ஸ்டெர்லைட் ஆலையை வாங்க விரும்புவோர் ஜூலை 4ஆம் தேதி மாலை 6 மணிக்குள் விண்ணப்பிக்க வேண்டும் என்று அந்நிறுவனம் கூறியுள்ளது.
கருத்துகள் இல்லை:
கருத்துரையிடுக