யாழ்ப்பாண உலகப்படவிழா .. demons in paradise படம் திரையிடப்படவில்லை ...சிலர் எதிர்ப்பு

thinakaran.lk : யாழ்ப்பாண சர்வதேச திரைப்பட விழா (Jaffna International Cinema Festival) தொடர்ச்சியாக 4 ஆவது வருடமாக எதிர்வரும் ஒக்டோபர் 03 ஆம் திகதி தொடக்கம் 8ஆ ம் திகதி வரை யாழ்ப்பாணத்தில் நடைபெற ஒழுங்கு செய்யப்பட்டுள்ளது. இது பக்கசார்பற்ற, சினிமாத்துறை சார்ந்த படைப்பாளிகளின் ஆக்க வெளிப்பாடுகளுக்கான ஒரு களமாகும்.
இது Agenda 14 மற்றும் சிலோன் தியேட்டர்ஸ் நிறுவனத்துடன் இணைந்து நடாத்தப்படுகிறது. இவ்விழாவில் கல்வித்துறை இணைப்பாளராக யாழ். பல்கலைக்கழகத்தின் நுண்கலைத்துறை பங்களிக்கிறது.
சுயாதீன திரைப்படக் கலையை யாழ்ப்பாணத்தில் கொண்டாடுவதுடன், முப்பது வருட யுத்த இழப்புக ளிலிருந்து மீளெழும் ஒரு முயற்சியாகவும் இது முன்னெடுக்கப்படுகிறது.
இத்திரைப் பட விழாவில் 30 நாடுகளைச் சேர்ந்த 80 திரைப்படங்கள் காட்சிப்படுத்தப்படவுள்ளன. இவற்றுள் முழுநீள, விவரண, குறுந்திரைப்படங்கள் ஆகியன உள்ளடங்கும். விழாவில் - ஆப்கானிஸ்தான், அவுஸ்திரேலியா, பங்களாதேஷ், பெல்ஜியம், பூட்டான், பிரேசில், கனடா, குறோஷியா, கொலம்பியா, செக். குடியரசு, எகிப்து, பிரான்ஸ், ஜேர்மனி, இந்தியா, ஜப்பான், கர்க்கிஸ்தான், கஸக்கிஸ்தான், மங்கோலியா, நேபாளம், போலந்து, பாகிஸ்தான், சிங்கப்பூர், சுலோவோக்கியா, இலங்கை, சுவிஸ்லாந்து, ஐக்கிய இராச்சியம், ஐக்கிய அமெரிக்கா, வியட்நாம் ஆகிய நாடுகளின் திரைப்படங்கள் திரையிடப்படுகின்றன.

இவ்வருட Jaffna ICF நிகழ்வு ஒக்டோபர் 3ஆம் திகதி யாழ்ப்பாணம் கார்கில்ஸ் சதுக்கத்தில் அமைந்துள்ள மெஜஸ்டிக் திரையரங்கில் மாலை 5.45 மணிக்கு ஆரம்பித்து, விருதுகள் வழங்கும் நிகழ்வு அதே திரையரங்கில் ஒக்டோபர் 8 ஆம் திகதி மாலை 6.15 மணிக்கு இடம்பெறும்.
விழாவின் ஆரம்பத் திரைப்படமாக, ‘த யங் கார்ல் மார்க்ஸ்’ (இயக்குனர் ஜேர்மனியைச் சேர்ந்த ரவூல் பெக்), முடிவு நாள் திரைப்படமாக ‘சுவீற் கன்றி’ (இயக்குனர் அவுஸ்ரேலியாவைச் சேர்ந்த ‘வாரிக் தோன்ரன்’) ஆகியன திரையிடப்படுகின்றன.
மூத்த தலைமுறைக் கலைஞர்களைப் பாராட்டி கெளரவிக்கவும், இளம் தலைமுறை திரைப்படக் கலைஞர்களை ஊக்குவிக்கவும் இவ்விழாவில் - வாழ்நாள் சாதனையாளர், சிறந்த முழுநீள அறிமுகத் திரைப்படம், மிகச் சிறந்த சர்வதேச குறுந்திரைப்படம், சிறந்த இலங்கை குறுந்திரைப்படம், மிகச் சிறந்த ஜனரஞ்சகத் திரைப்படத்துக்கான பார்வையாளர் விருது என 05 விருதுகள் வழங்கப்படவுள்ளன.
இவ்வருட விழாவில் Saffaa Elaisy Haggag (எகிப்து), ஊர்வசி அச்சனா (இந்தியா) மற்றும் முரளிதரன் மௌரன் (இலங்கை) ஆகியோர் அறிமுக திரைப்படங்களுக்கான நடுவர்களாக இருப்பர். Carla Maria Losch (ஜெர்மனி), Aunohita Mojumdar (இந்தியா), டொக்டர் ஜெயசங்கர் (இலங்கை) ஆகியோர் குறுந்திரைப்படங்களுக்கான நடுவர்களாகப் பங்காற்றுவர்.
மலையாள இயக்குனர் சஜி நாராயண் கருண் படைப்புக்களை நினைவு கூரவிருக்கிறது. அவரின் Andrzej Wajda, Krzysztof Kieslowski, Roman Polanski , Andrzej Munkand Jerzy Kawalerowicz ஆகியோரின் புத்தாக்கம் செய்யப்பட்ட மூன்று திரைப்படங்கள் காட்சிப்படுத்தப்பட இருக்கின்றன.
இலங்கைத் திரைப்படப் பிரிவு சரித்திர முக்கியத்துவம் வாய்ந்த விவரணப்படத் தொகுதி ஒன்றை இரண்டாவதுமுறையும் இந்த விழாவில் வழங்கவிருக்கிறது.
சிறப்புத் திரைப்படங்களாக தீபா மேத்தாவின் ‘வன்செயலின் கட்டமைப்பு’ (The Anatomy of Violence), லூயிஸ் ஒஸ்மண்ட்டின் ‘Versus: The Life and Films of Ken Loach’, பிராட் ஓல்கூட் மற்றும கிரஹாம் ரௌன்சிலியின் ‘Landfill Harmonic’ ஆகியன காண்பிக்கப்படவிருக்கின்றன.
விவரணத்திரைப்படங்கள் குறித்த பயிற்சிப்பட்டறையொன்றை நடாத்த இருப்பதுடன் ‘திரைப்படங்களுக்கான பொதுமக்கள் நிதி திரட்டல்’ சம்பந்தமான கலந்துரையாடல் ஒன்றிலும் கலந்துகொள்ளவிருக்கிறார்.
யாழ்ப்பாணப் பல்கலைக்கழக நுண்கலைத்துறைத் தலைவரும் காண்பியக் கலைஞருமான கலாநிதி ரி. சனாதனன் ‘வெள்ளித்திரை 70 - 80களின் யாழ்ப்பாண சினிமாக்களுடனான ஒரு பயணம்’ குறித்த தொகுப்புரையை வழங்கவுள்ளார்.
இலங்கைத் திரைப்பட ஓளிப்பதிவுக் கலைஞர் வைரமுத்து வாமதேவனுக்கு வாழ்நாள் சாதனையாளர் விருதினை வழங்கி, அவரின் சினிமாத்துறைப் பங்களிப்புக்கு யாழ்ப்பாண சர்வதேச திரைப்பட விழா மரியாதை செய்யவிருக்கிறது.
சிலோன் தியேட்டர்ஸ் நிறுவனம் தொடர்ந்தும் இரண்டாவது தடவையாகச் சிறந்த குறுந்திரைப்படத்திற்கான விருதினையும், பணப்பரிசு ரூபா ஒரு இலட்சத்தையும் வழங்கவிருக்கின்றது.
இவ்விழாவின் பிரதான அரங்குகளாக மஜெஸ்டிக் கொம்பிளெக்ஸ், -கார்கில்ஸ் சதுக்கம், யாழ்ப்பாணப் பல்கலைக்கழகக் கைலாசபதி கலையரங்கம் மற்றும் யாழ். நூலகக் கேட்போர் கூடம் ஆகியன அமையவுள்ளன. தொடர்புடைய ஏனைய நிகழ்வுகள் பிரித்தானிய கவுன்ஸிலிலும், அமெரிக்கன் கோர்னரிலும் இடம்பெறும்.
விழாவினை நடாத்த உதவும் ஏனைய பங்காளிகளாக - அரசாங்கத் திரைப்படப் பிரிவு, திண்ணை ஹோட்டல்ஸ், ஆண்ட்ரூ டிரவல்ஸ் கொம்பனி, யாழ். ஊடக அமையம், சூரியன் எவ். எம்., கோதே இன்ஸ்ரியூட், கிரைசலீஸ் மற்றும் ஜி.ஐ. சட் ஆகியவை அமைகின்றன.

thenee.com- ஜீவா.: இலங்கை தமிழ் சமூகம் குறிப்பாக யாழ்பாண சமூகத்தின் விழுமியங்கள் ‘கழுதை தேய்ந்து கட்டெறும்பாகி’ அதுவும் தேய்ந்து சூனியமாகியிருக்கிறது.
ஒருவருடைய கருத்தை என்ன? அபிப்பிராயத்தைக் கூட செவிமடுக்கமுடியாத முண்டங்களாகிவிட்டது. அப்படியிருந்தும் மாற்று வழிகளில் ஏதாவது ஒரு விடயம் முகிழ்புப் பெறுமாயின் அதனை கருக்கிவிடுவதில் தமிழ் சமூகத்துக்கு ஈடு இணை எதுவும் இல்லை. இவ்வாறான வன்முறையான செயற்பாடுகளை கண்டுகொள்ளாமல் விடுவதுமட்டுமல்ல இருட்டடிப்புச் செய்து கருக்கிவிடும் – வக்காலத்து வாங்கும் யாழ்பாணிய ஊடகங்களின் பத்திரிகா தர்மத்துக்கு எவ்வளவு கொடுத்தாலும் தகும்.

மேலும் தமிழ் தேசியப் பால் குடிக்கும் மாற்று, முற்போக்கு சிந்தனையாளர்கள் என்று பறைசாற்றும் ஜாம்பவான்கள் இதற்கெல்லாம் பொங்கி எழுமாட்டார்கள். அதேவேளை இனவாத இலங்கை அரசாங்கம் இதே செயற்பாட்டில் ஈடுபட்டிருந்தால் எப்படி பொங்கியிருப்பார்கள்?
யாழ்ப்பாணத்தில் நடைபெறும் சர்வதேச திரைப்பட விழாவில் யூட் ரட்ணம் இயக்கிய டீமன்ஸ் இன் பரடைஸ் திரையிடப்படும் என அறிவித்தல்கள் வெளியாகிய நிலையில் சமூகத்தின் அழுத்தம் காரணமாக இத் திரைப்படம் திரையிடப்பட மாட்டாது என இத் திரைப்பட விழாவுக்கு பொறுப்பாக இருப்பவரிடம் இருந்து அறிவித்தல் வெளியாகிறிருக்கிறது.
தங்களை ‘சமூகம்’ என்று அடையாளப்படுத்திய ஒரு கும்பலின் அழுத்தம் காரணமாக “சொர்க்கத்தில் சாத்தான்கள்” திரைப்படம் திரையிடப்படமாட்டாது என அதற்கு பொறுப்பான அதுவும் தென்னிலங்கை சார்ந்த சகோதரர்களால் தீர்மானிக்கப்பட்டுள்ளது.
சமூகம் என்பது கடல், சமுத்திரம். ஆழமும் பரந்து விரிந்த பார்வையும் உள்ளது. அதற்குள் ஆயிரமாயிரம் கருத்துக்களையும் அர்த்தங்களையும் என்றுமே சலனமற்ற தன்மையையும் காணலாம். அது உணர்சிகளின்றி உணர்வுகளால் ஆனது. அதன் பெறுமதி தெரியாத சில சருகுகள் இணைந்து இத் திரைப்படத்தை திரையிடாது தடுத்தது காலத்தின் கேவலம். அதற்கு யாழ்பாணிய பத்தரிகைகள் சான்று.
கருத்தை கருதுக்களால் மோத தகுதியற்ற சமூகம் குறைந்த பட்சம் கருத்தை அபிப்பிராயங்களால் கூட மோத தகுதியற்ற சமூகம் வன்முறை சார்ந்த, வன்முறையான சமூகமாகவே என்னென்றும் நிலைக்கும்.
இது வெளிப்படையாகவே தெரிந்த ஒன்றுதான். முள்ளிவாய்காலில் சாகடிக்கப்பட்ட  புலித்தலைவரை காலத்துக்கும் காவித்திரிவதுதான் தமிழ் சமூகத்துக்குக் கிடைத்த சாபக்கேடு.
காலத்துக்குக் காலம் சாத்தானை காவித்திரியும் சாபக்கேடுளை முகம் கொடுக்க முடியாத முண்டமாவும் பிண்டமாகவும் சீரழிந்த வாழ்கையில் உளலும் மனங்களோடு மனங்களாக!
நமது காலாசாரம், நமது தேசம் இவை காட்டுகின்ற விசயங்கள் மட்டுமே சரியானவையாக இருக்கும் என நினைப்பது தவறு. அப்படி இருக்கும் போது தனிமனித வழிபாட்டில் சுய இன்பம் காணும் சமூக விழுமியங்களில் ஒரு சிறு புல்லையேனும் வளர்க்க முடியாது.

thenee.com