காந்தி-நேருவின் லட்சியங்களை பரப்பவே அசோசியேட்டட் ஜர்னலுக்கு கடன்: காங்கிரஸ் விளக்கம்

முன்னாள் பிரதமர் நேருவால் நிறுவப்பட்ட 'அசோசியேட்டட் ஜர்னல்ஸ்' நிறுவனத்துக்கு சொந்தமான ரூ.1600 கோடி மதிப்பிலான சொத்துக்களை, சோனியா, ராகுல்காந்தி தொடங்கியுள்ள 'யங் இந்தியன்' நிறுவனம் மிக குறைந்த விலைக்கு வாங்கி இருப்பதாக ஜனதா கட்சித் தலைவர் சுப்பிரமணியசாமி குற்றம் சாட்டினார். மேலும் அசோசியேட் ஜர்னல்ஸ் நிறுவனத்துக்கு காங்கிரஸ் கட்சி ரூ. 90 கோடி கடன் கொடுத்ததாகவும் ஆனால் ரூ. 50 லட்சம் திரும்ப பெறப்பட்டு, கணக்கை முடித்துவிட்டதாகவும் சுப்பிரமணியசாமி கூறியிருந்தார். இதுபற்றி கிங்கிரஸ் பொதுச்செயலாளர் ஜனார்த்தன் திவேதி இன்று விளக்கம் அளித்தார். அப்போது அவர் கூறியதாவது:-


நாங்கள் ஏன் வணிக நோக்கத்திற்காக கடன் வழங்க வேண்டும்? வட்டியில்லாமல் கடன் வழங்கப்பட்டிருக்கும் போது, அதில் எப்படி வணிக நோக்கம் இருக்க முடியும்? மகாத்மா காந்தி மற்றும் நேரு ஆகியோரின் லட்சியங்களை பரப்பவே அசோசியேட்டட் ஜர்னல்ஸ் நிறுவனத்துக்கு கடன் வழங்கப்பட்டது. எங்கள் அரசியல் கடமையைத்தான் செய்திருக்கிறோம்.

அசோசியேட்டட் பிரஸ் நிறுவனத்திற்கு புத்துயிர் அளிக்கும் வகையில் அதன் பங்குகளை யங் இந்தியா வாங்கியது. இதன்மூலம் அந்த நிறுவனம் உற்பத்தியை மீண்டும் தொடங்கியதுடன், அதன் பத்திரிகைகளும் விரைவில் வெளியாக உள்ளன. மேலும், நாங்கள் கடன் அளித்ததன்மூலம் அந்நிறுவனத்தின் 700 ஊழியர்கள் பயனடைந்துள்ளனர். எங்கள் அரசியல் பணி குறித்து எந்த கட்சியும் முடிவு செய்ய முடியாது. இந்த விஷயத்தில் எந்த சவாலையும் சந்திக்க தயாராக இருக்கிறோம்.இவ்வாறு அவர் கூறினார்.   http://www.maalaimalar.com