இந்நிலையில், உச்ச நீதிமன்றம் ஜெயலலிதாவிற்கு ஜாமின் வழங்க, சிறையில் இருந்து வெளியே வந்த ஜெயலலிதா, போயஸ் கார்டனில் தங்கியுள்ளார். பொது நிகழ்ச்சிகளில் பங்கேற்பதில்லை.தனக்கு எதிராக வழங்கப்பட்ட தீர்ப்பை எதிர்த்து, கர்நாடகா உயர் நீதிமன்றத்தில், ஜெயலலிதா மேல் முறையீடு செய்தார். இதில் விவாதம் முடிந்து, தீர்ப்பு எப்போது வேண்டுமானாலும் வெளியாகும் நிலை உள்ளது.தீர்ப்பு எப்போது வரும் என்பது தெரியாததால், கட்சியினர் அனைவரும், திக், திக், திக் மனதுடன் உள்ளனர்.தீர்ப்பு சாதகமாக வரவேண்டும் என்பதற்காக, வழிபாட்டுத் தலங்களில், வழிபாடுகளை நடத்தும்படி ஏற்கனவே, அ.தி.மு.க., தலைமை உத்தரவிட்டிருந்தது. தற்போது, தீர்ப்பு வரும் வரை, வழிபாடுகளை தொடரும்படி கட்சியினருக்கு உத்தரவிட்டு உள்ளது.
இதனால், அமைச்சர்கள், எம்.பி.,க்கள், எம்.எல்.ஏ.,க்கள், மாவட்ட செயலர்கள் மற்றும் நிர்வாகிகள், தங்கள் பகுதிகளில், யாகம் நடத்துவது, பால் குடம் எடுப்பது, மண் சோறு சாப்பிடுவது, கோ பூஜை நடத்துவது, இலவச திருமணம், கோ தானம் என, பல்வேறு வழிபாடுகளை நடத்தி வருகின்றனர்.யாகங்களை பிரம்மாண்டமாக நடத்துவதில், அமைச்சர்கள் இடையே கடும் போட்டியும் நிலவுகிறது. ஒவ்வொருவரும் பிரம்மாண்டமாக யாகம் நடத்தி, அதன் புகைப்படங்களை, கட்சி தலைமைக்கு அனுப்பி வருகின்றனர்.
- நமது நிருபர் - தினமலர்.com
கருத்துகள் இல்லை:
கருத்துரையிடுக