hindutamil.in : சென்னை: தமிழகத்தில் வாக்கு எண்ணிக்கை நாளான மே.4 அன்று சட்டம் ஒழுங்கு சீர்குலையக்கூடும் என்ற அச்சம் காரணமாக முன்னெச்சரிக்கை நடவடிக்கைகள் எடுக்கக்கோரி தமிழக தலைமைத் தேர்தல் அதிகாரி மற்றும் தமிழக காவல்துறைத் தலைவர் ஆகியோருக்கு திமுக அமைப்புச் செயலாளர் ஆர்.எஸ். பாரதி மனு அளித்துள்ளார்.
தமிழக தலைமைத் தேர்தல் அதிகாரி மற்றும் தமிழக காவல்துறைத் தலைவர் ஆகியோருக்கு திமுக அமைப்புச் செயலாளர் ஆர்.எஸ். பாரதி அளித்த மனுவில், “2026 தமிழ்நாடு சட்டப்பேரவைத் தேர்தல்களுக்கான வாக்கு எண்ணிக்கை நடைபெறும் நாளன்று, பாரதிய ஜனதா கட்சியும் , அக்கட்சியின் தூண்டுதலின் பேரில் செயல்படும் பிற அரசியல் கட்சிகளும் இணைந்து, வாக்கு எண்ணும் மையங்களில் குழப்பங்களை விளைவிக்கத் திட்டமிட்டுள்ளதாக எங்களுக்கு நம்பகமான தகவல்கள் கிடைத்துள்ளன.
இத்தகைய சீர்குலைவு செயல்பாடுகள், வாக்கு எண்ணும் மையங்களுக்கு உள்ளேயும் வெளியேயும் மட்டுமின்றி, அரசியல் கட்சிகளின் அலுவலகங்கள் உள்ளிட்ட பிற பதற்றமான இடங்களுக்கும் பரவக்கூடும் என்றும் நாங்கள் அஞ்சுகிறோம்.
இத்தகைய சூழலைக் கருத்தில் கொண்டு, பெரிய அளவிலான சட்டம்-ஒழுங்குப் பிரச்சினைகள் எழக்கூடும் என்ற நியாயமான அச்சம் நிலவுகிறது. இது, ஒரு சுதந்திரமான மற்றும் நியாயமான தேர்தல் நடைமுறையை செயல்படுத்துவதில் பெரும் பாதிப்பை ஏற்படுத்தக்கூடும்.
இத்தகைய சூழ்நிலையில், எவ்விதமான விரும்பத்தகாத சம்பவங்களும் நிகழாமல் தடுக்கும் பொருட்டு, போதுமான எண்ணிக்கையில் பாதுகாப்புப் படையினரை நியமித்தல் மற்றும் சட்ட அமலாக்க முகமைகளுடன் தேவையான ஒருங்கிணைப்பை மேற்கொள்ளுதல் உள்ளிட்ட உடனடி மற்றும் தகுந்த முன்னெச்சரிக்கை நடவடிக்கைகளைத் தங்கள் அலுவலகம் மேற்கொள்ளுமாறு நாங்கள் கேட்டுக் கொள்கிறோம்.
மேலும், 04.05.2026 அன்று தமிழகம் முழுவதும் அமைதி, பொது ஒழுங்கு மற்றும் வாக்கு எண்ணும் நடைமுறையின் நம்பகத்தன்மை ஆகியவை முழுமையாகப் பாதுகாக்கப்படுவதை உறுதிசெய்யும் வகையில் அனைத்து நடவடிக்கைகளும் மேற்கொள்ளப்பட வேண்டும் என்றும் நாங்கள் கேட்டுக்கொள்கிறோம்.
தங்களின் உரிய நேரத்திலான தலையீடு, தேர்தல் நடைமுறையின் புனிதத்தைக் காத்து, ஜனநாயக அமைப்பின் மீதான பொதுமக்களின் நம்பிக்கையை உறுதிப்படுத்தும் என்று நாங்கள் உறுதியாக நம்புகிறோம்”எனத் தெரிவித்துள்ளார்.
கருத்துகள் இல்லை:
கருத்துரையிடுக