அமைச்சர் துரைமுருகன் : டங்ஸ்டன் சுரங்க பணிக்கு எந்த அனுமதியும் தரவில்லை!

Hindu Tamil  சென்னை: மதுரை மாவட்டம் மேலூரில் டங்ஸ்டன் சுரங்கப் பணிகளை மேற்​கொள்ள தமிழக அரசு எந்த அனும​தி​யும் அளிக்க​வில்லை என்று நீர்​வளத் துறை அமைச்சர் துரை​முருகன் தெரி​வித்​துள்ளார்.
இது தொடர்பாக அவர் நேற்று வெளி​யிட்ட செய்திக்​குறிப்​பில் தெரி​வித்​திருப்​ப​தாவது:
மக்களின் வாழ்​வா​தாரத்தை பாதிக்​கும் எந்த சுரங்கப் பணிகளுக்​கும் தமிழக அரசு எப்போதும் அனுமதி அளிக்காது என்று உறுதி​யளித்து,
இந்துஸ்​தான் ஜிங்க் நிறு​வனத்​துக்கு அளிக்​கப்​பட்ட சுரங்க உரிமத்தை ரத்து செய்​யு​மாறு வலியுறுத்தி பிரதமருக்கு, தமிழக முதல்வர் கடிதம் எழுதி​யுள்​ளார்.
இதை ஏற்று பொது மக்கள் போராட்டத்தை விலக்​கிக் கொண்​டுள்ளனர்.

தவறான தகவல்: முதல்வர் ஸ்டா​லினின் உறுதியான நடவடிக்கையை மக்கள் ஏற்றுக் கொண்டதை சகிக்க முடியாத சிலர், சுரங்க உரிமத்​துக்கு தமிழக அரசு ஒப்புதல் அளித்​ததாக விஷமத்​தனமான கருத்து​களைப் பரப்பி வருகின்​றனர். மேலும், இந்த உரிமத்தை வழங்​கு​வதற்கு முன்பாக மாநில அரசின் கருத்து​களைப் பெற்​றதாக மத்திய அரசும் தவறான தகவலைத் தெரி​வித்​துள்ளது.

2023 செப்​டம்பர் மாதம், முக்கிய கனிமவளங்களை ஏலம் விடுவது தொடர்பாக கனிமக் கொள்​கை​யில் மேற்​கொள்​ளப்​பட்ட திருத்​தங்களை மத்திய அரசு தெரி​வித்​தது. உடனேயே, அந்த ஆண்டு அக். 3-ம் தேதி மத்திய சுரங்கத் துறை அமைச்சருக்கு கடிதம் எழுதினேன். அதில் தமிழக அரசின் எதிர்ப்பை தெரி​வித்​தேன். ஆனால், நவ. 2-ம் தேதி மத்திய சுரங்கத் துறை அமைச்சர் அளித்த பதிலில், உரிய சட்டத் திருத்​தங்களை மேற்​கொண்ட பிறகே ஏலம் விடப்​படு​வ​தாக​வும், தேசிய அளவிலான தேவை​களைக் கருத்​தில் கொண்டு, மாநில அரசுகள் இந்தக் கொள்​கைக்கு ஒத்துழைக்க வேண்​டும் என்றும் குறிப்​பிட்டு, நமது எதிர்ப்புகளை நிராகரித்​தார்.

தொடர்ந்து, மேலூர் பகுதி​யில் உள்ள நிலங்​களைப் பற்றிய விவரங்கள் மத்திய அரசால் கேட்​கப்​பட்​ட​போதும், உத்தேசிக்​கப்​பட்​டுள்ள பகுதி​யில் உள்ள அரிட்​டாபட்டி பகுதி​யானது பல்லு​யிர் பெருக்க வரலாற்றுத் தலம் என்பதை சுட்​டிக்​காட்​டினோம். இவை எவற்​றை​யுமே கருத்​தில் கொள்ளாத மத்திய அரசு, டங்ஸ்டன் உரிமத்தை தனியார் நிறு​வனத்​துக்கு அளித்​தது.

தற்போது மக்களின் எதிர்ப்​பை​யும், முதல்​வரின் உறுதியான நிலைப்​பாட்​டை​யும் கண்டு மிரண்டு மத்திய அரசும், அதனோடு சேர்ந்து இரட்டை வேடம் போடும் கட்சிகளும், மக்களின் கவனத்தை ​திசை ​திருப்ப, சுரங்க ஏலத்​துக்கு தமிழக அரசு ஒப்பு​தல் தெரி​வித்​ததாக பொய் செய்தி​களைப் பரப்பி வரு​கின்றன. இவற்றை மக்​கள் நம்பத் த​யாராக இல்லை. இவ்​வாறு அமைச்​சர்​ தெரி​வித்​துள்​ளார்​.