5 மற்றும் 8ஆம் வகுப்பு கட்டாய தேர்ச்சி ரத்து; மத்திய அரசின் முடிவால் அதிர்ச்சி - RTE Amendment 2024 :

 tamil.samayam.com - ஜான்வி :  RTE Amendment 2024 : தமிழ்நாட்டில் 8ஆம் வகுப்பு வரை கட்டாய தேர்ச்சி முறை அமலிக்கும் இருக்கும் நிலையில், 5 மற்றும் 8ஆம் வகுப்புகளுக்கு கட்டாய தேர்ச்சி முறையை மத்திய அரசு ரத்து செய்திருக்கிறது.
இதற்கான அறிவிப்பு தற்போது வெளியாகியுள்ளது. இந்தியாவில் இலவச கட்டாயக் கல்வி உரிமைச் சட்டத்தின்படி, 5 ஆண்டுகளுக்கு பிறகு இந்த மாற்றம் கொண்டுவரப்பட்டுள்ளது.
மத்திய கல்வி அமைச்சகத்தின் இந்த முடிவு மாணவர்களுக்கு அதிர்ச்சியை ஏற்படுத்தியுள்ளது.
Samayam Tamilகட்டாய தேர்ச்சி முறை ரத்து
கட்டாய தேர்ச்சி முறை ரத்து
RTE Amendment 2024 Compulsory pass for class 5 and 8th cancelled :

இந்தியா முழுவதும் இலவச கட்டாயக் கல்வி உரிமைச் சட்டப்படி 1 முதல் 8-ம் வகுப்பு வரை மாணவர்களை கட்டாயத் தேர்ச்சி செய்யும் முறை அமலில் இருந்த நிலையில், தற்போது 5 மற்றும் 8ஆம் வகுப்பிற்கான கட்டாய தேர்ச்சி முறையை மத்திய அரசு ரத்து செய்திருக்கிறது. 5 ஆண்டுகளுக்கு பின்பு கொண்டுவரப்படும் இந்த மாற்றத்தினால் 5 மற்றும் 8ஆம் வகுப்பிற்கு இறுதி ஆண்டு தேர்வு நடத்தி தகுதிப்பெற்ற மாணவர்கள் மட்டும் தேர்ச்சி அளிக்கவும், தகுதி அடையாத மாணவர்களுக்கு 2 மாதங்கள் பின்னர் மீண்டும் தேர்வு எழுத அனுமதிக்கவும் உத்தரவிடப்பட்டுள்ளது.

8ஆம் வகுப்பு வரை கட்டாய தேர்ச்சி
இலவச கட்டாயக் கல்வி உரிமைச் சட்டம் 2009இன் படி, 1 முதல் 8ஆம் வகுப்பு வரை உள்ள மாணவர்களுக்கு கட்டாய தேர்ச்சி முறை அமல்படுத்தப்பட்டது. அதன்படி, தமிழ்நாட்டில் இந்த முறை அமலில் உள்ளது.

பொருளாதாரத்தில் பின்தங்கிய, நலிவு அடைந்த மாணவர்கள் கல்வி கற்கும் விதத்திலும், கிராமபுறத்தில் இருக்கும் மாணவர்களுக்கு பள்ளி கல்வி கிடைக்கும் வகையில், இடைநிற்றலை தடுக்கும் வகையில், கட்டாய தேர்ச்சி முறை அமல்படுத்தப்பட்டது.

எதிர்ப்பு தெரிவித்த மாநிலங்கள்
இருப்பினும் இந்த முறைக்கு சில மாநிலங்கள் எதிர்ப்பு தெரிவித்தனர். 8ஆம் வகுப்பு வரை மாணவர்களை தேர்ச்சி பெற வைப்பதினால், 10ஆம் வகுப்பு பொதுத் தேர்வில் மாணவர்களின் தேர்ச்சி குறைவதாக கூறினர். மேலும், மாணவர்களின் கற்றல் திறனும் குறைவாக கருத்துகளை முன்வைத்தனர். 2015ஆம் ஆண்டு நடைபெற்ற CABE கூட்டத்தில் 28 மாநிலங்களில் 23 மாநிலங்கள் கட்டாய தேர்ச்சி முறைக்கு எதிர்ப்பு தெரிவித்தனர். அதன் அடிப்படையில், 2019ஆம் ஆண்டு மார்ச் மாதம் நடைபெற்ற நாடாளுமன்ற கூட்டத்தில் இலவச கட்டாயக் கல்வி உரிமைச் சட்டத்தில் (RTE Act) மாற்றம் கொண்டுவரப்பட்டது.

அதன்படி, கட்டாய தேர்ச்சி முறையில் மாநிலங்கள் விருப்பத்திற்கு ஏற்ப 5 மற்றும் 8ஆம் வகுப்பிற்கு தேர்வு நடத்தி கொள்ள அனுமதிக்கப்பட்டது. இருப்பினும் மாணவர்கள் கட்டயாமாக 8ஆம் வகுப்பு வரை படிப்பை முடிப்பதை உறுதி செய்ய வேண்டும் என அறுவுறுத்தப்பட்டது. அந்த வகையில், குஜராத், ஒடிசா, மத்திய பிரதேசம், ஜார்கண்ட், கர்நாடகா, டெல்லி ஆகிய மாநிலங்களில் 5 மற்றும் 8ஆம் வகுப்பிற்கு இறுதி ஆண்டு தேர்வு நடைபெறுகிறது.

கட்டாய தேர்ச்சி முறை முழுமையாக ரத்து
தற்போது மத்திய அரசு இலவச கட்டாயக் கல்வி உரிமைச் சட்டத்தில் முக்கிய திருத்தத்தை ( RTE Amendment 2024) அறிவித்துள்ளது. அதன்படி, 5 மற்றும் 8ஆம் வகுப்பிற்கான கட்டாய தேர்ச்சி முறை ரத்து செய்யப்பட்டுள்ளது.

இந்த வகுப்புகளுக்கு ஆண்டு இறுதி தேர்வு நடத்தப்பட்டு, அதில் தோல்வி அடையும் மாணவர்களுக்கு கூடுதல் பயிற்சி வழங்கப்பட்டு மீண்டும் 2 மாதங்கள் கழித்து தேர்வு நடத்த உத்தரவிடப்பட்டுள்ளது. அதிலும் தோல்வி அடையும்பட்சத்தில் மாணவர்கள் மீண்டும் அதே வகுப்பில் நீடிக்க வைக்க அனுமதிக்கப்பட்டுள்ளது.

தமிழ்நாடு அரசின் நிலை என்ன?
5 மற்றும் 8ஆம் வகுப்பு மாணவர்களுக்கு பொதுத் தேர்வு நடத்துவதற்கு ஏற்கனவே தமிழ்நாடு அரசு மறுப்பு தெரிவித்து வருகிறது. 2019ஆம் ஆண்டு வந்த நடைமுறையின்போதும், மாணவர்களின் நலன் கருதி கட்டாய தேர்ச்சி முறையில் மாற்றம் கொண்டுவரப்படாது என்ற நிலையை தமிழ்நாடு அரசு எடுத்தது. கல்வியின் தரத்திலும், உயர்கல்வியிலும் முன்னோடியாக இருக்கும் மாநிலத்தில், 5 மற்றும் 8ஆம் வகுப்பு மாணவர்களுக்கு பொதுத் தேர்வு அவசியமில்லை என்பதில் உறுதியாக இருந்து வருகிறது.

5 மற்றும் 8ஆம் வகுப்பிற்கு பொதுத் தேர்வை எதிர்ப்பு மாநிலங்கள்
தமிழ்நாட்டை போல, கேரளாவிலும் 5 மற்றும் 8ஆம் வகுப்பிற்கு பொதுத் தேர்வை நடத்துவதில் எதிர்ப்பு இருந்து வருகிறது. சமீபத்தில் கர்நாடகாவில் 5, 8, 9,11ஆம் வகுப்பிற்கு பொதுத் தேர்வு நடத்த முடிவெடுக்கப்பட்ட நிலையில், உயர்நீதிமன்றத்தினால் தடுக்கப்பட்டது என்பது குறிப்பிடத்தக்கது.
ஜான்வி